हटिया जैबै / अंजनी कुमार सुमन

जैबै साँझे हटिया पर
चच्चा के फटफटिया पर
बिस्कुट निमचुस खूब किनैबै
नै मानब खटखटिया पर।
जैबै साँझे हटिया पर।
चच्चा के फटफटिया पर

रंग-बिरंगा फुकना लेबै
ऊन के बनलाँ सुगना लेबै
फटफटिये पर बैठल रहबै
गोर नै धरबै मटिया पर।
जैबे साँझे हटिया पर
चच्चा के फटफटिया पर।

करका-करका चश्मा लेबै
हमहुँ आपनोॅ शान देखैबै
कल्हे सें मईया रखने छै
नवका अंगा खटिया पर।
जैबै साँझे हटिया पर
चच्चा के फटफटिया पर।