आमा / राजेन्द्र शलभ

सूर्यजस्तै ठूलो रातो टीका
निधारमा लगाउँदा
मेरी आमा साह्रै राम्री देखिनुहुन्थ्यो
संसारकै सबभन्दा तेजस्वी स्वास्नीमानिस
तर बुबा बित्नुभएपछि
आमाले रातो टीका लगाउन छोड्नुभयो
बिना टीका मलिन देखिन्छ आमाको अनुहार ।

जब–जब गोधूलिको बेला
निधारमा सूर्यको रातो टीका लगाएको
आकाशलाई देख्छु
म आमालाई सम्झन्छु ।
रातो टीका लगाएको
आकाश पनि राम्रो देखिन्छ
तर आमा जत्तिको राम्रो होइन ।