भारत की संस्कृति के लिए... भाषा की उन्नति के लिए... साहित्य के प्रसार के लिए
घेरले आंधर जाल हे / जयराम दरवेशपुरी
Kavita Kosh से
फूटल करम हे जनु झोपड़ी वला किसान के
चाँदी काटे शान हे एतबड़ दू महला मकान के
खून पसेना एक करे जे ऊ गबड़ा में डूबल हइ
सटकल पेट देह हे कूबड़ अँखिया जोती बूझल हइ
धरा टिकल हे जेकरा बल पर गुलगुल सकल जहान के
ओकरे उपजल सब अनाज पर बजरा केहे मोछ पजल
पुंजियो न´ बहुरे हे ओकर जान बड़ेरी में हे टँगल
मंगनी में सब मेहनत जाहे थउआ मटिया सान के
ओकरे सभे कमइया पर दुनिया आज नेहाल हे
ओकरे अँखिया के आगू घेरले अन्हरजाल हे
कहिया उगतइ ओक्कर सूरज देखत मुँह बिहान के
सब दिन छल से ओकर अँखिया में पोरला हे धूरी
आशा पर अंटकल बेचारा ई ओकर मजबूरी
अपने हाथ संवारत अब ऊ अप्पन तान वितान के।
