भारत की संस्कृति के लिए... भाषा की उन्नति के लिए... साहित्य के प्रसार के लिए
डोली उठाके कहरिया (गीत) / मथुरा नाथ सिंह 'रानीपुरी'
Kavita Kosh से
डाली उठा के कहरिया
बढ़ोॅ संभली उगरिया।...
उठलै तूफान आय सगठैं ललकारै
बाधे दहाड़ै साँपो फूफकारै
कुत्ता कानै छै नगरिया, बढ़ोॅ...
सगरो छै कचकच, छीन-छोर झगड़ा
चामोॅ के थैला पर, कुत्ता के पहरा
छीनै नै कोइये बहुरिया, बढ़ोॅ...
साधू कोय संत, कोय रबन्हौ निहारै
ऊॅच-नीच, भेद-भाव, सपना विचारै
घरोॅ लागै छै अन्हरिया, बढ़ौॅ...
उटका पैंची करै छै उधारोॅ
छीन-छोर झगड़ा मिंघाड़ै किनारोॅ
सगरो उठै छै लहरिया, बढ़ोॅ...
कहै छै मथुरा डोली निहारोॅ
लूटै नै लाज अरे पगड़ी सम्हारोॅ
कान्होॅ नै छूटै कहरिया, बढ़ोॅ...
