भारत की संस्कृति के लिए... भाषा की उन्नति के लिए... साहित्य के प्रसार के लिए
बगुला मारे डंड बैठकी / जयराम दरवेशपुरी
Kavita Kosh से
बगुला मारे डंड बैठकी
बउआ देखे अइना
मैना चढ़ के चलल पालकी
सुग्गा बाँटे बइना
बाघ बराहिल चेउंके पीछे
सजल सियार के टोली
पड़ुका-पडु़की ले संगीन
शरहद पर चलवे गोली
बिड़नी के रगदऽ हइ भौंरा
लेले हाथ में परना
सरगम पर नाचऽ हे तितली
झिंगुर गीत सुनावे
चउका बइठल मुसके चिरइं
हरियल वेद सुनावे
घोड़ा पर चढ़-चढ़ के धपछू
साज रहल हे सइना
टोली पर टोली निकलल हइ
तितिर बटेर बहादुर
मोर मचावे भगदड़ रण में
थपड़ी बजवे दादुर
छेंक रहल हे गीध झपकी
फइला-फइला डइना
शरहद पर जब मचत लड़इया
केप्टन कोयल बजबत सीटी
महुअल गिरवत गोला बारूद
बम गिरावऽ चींटी
लाल रकत से रांगल धरती
गमकऽ लगत बिसइना।
