भारत की संस्कृति के लिए... भाषा की उन्नति के लिए... साहित्य के प्रसार के लिए
मुंहिंजी ख़ामोशी बणी बंसरी, अॼु ॻाए थी / हरि दिलगीर
Kavita Kosh से
मुंहिंजी ख़ामोशी बणी बंसरी, अॼु ॻाए थी,
मुंहिंजी दिलिड़ी मुंहिंजे अखिड़ियुनि मां लिया पाए थी।
आरजू़ मुंहिंजी मूं खे अर्श ते पहुचाए थी,
इंडलठि मिस्ल कढी रंग, सा लहराए थी।
दिल जे तहख़ाने खे हिक आस ई चमकाए थी,
हिक कली सारे गुलिस्तान खे मुशिकाए थी।
घुरिज, आज़ाद पखीअड़े खे पई, जोॻे जी,
अर्श ते खेसि उॾामण खां सा अटिकाए थी।
बाजे़ तारनि में पसां, बाजे़ गुलनि, झरिणनि में,
मुंहिंजी मंज़िल ई मूंखे राह खां भटिकाए थी।
चोॼ मां हीर थधी, ज़ख़्म चुमे गुल गुल जा,
ॼणि फटियल दिल खे मिठे प्यार सां थफकाए थी।
चंडु ककरनि में, जीअं कुंवारि नएं घूंघट में,
पाणही मुशिके थी ऐं पाणही शरमाए थी।
जे सरउ साड़े छॾियो दिलि जे चमन खे दिलगीर,
ऋतु बसन्ती थी अचे, हीर परियां ॻाए थी।
