भारत की संस्कृति के लिए... भाषा की उन्नति के लिए... साहित्य के प्रसार के लिए
शीतलहर के धात हे / जयराम दरवेशपुरी
Kavita Kosh से
नया बरिस के नयका बादर
के सिहरल सौगात हे
पछिया के सरगम पर सगरे
शीतलहर के धात हे
सिहर रहल हे देह समुच्चे
धरती कनकन सोरा
तरे तोसक ऊपर कम्मल
कनतउ धूरा जोरा सप्-सप् हावा
सोध रहल हे ठंढ बड़ी दिन रात हे
केकरे चारा चले न तनिको
ई पछिया लफार में
बाले बच्चे घुकरी देले
लोघड़ल हे पोवार में
भरल बोरसी बनिया जाहे
कपकप्पी हे गात में
खट्-खट् दाँत बजड़ रहलो हे
कनकन्नी हे जोर के
बूढ़ा-बूढ़ी कत्ते गेला
गंगा जी के कोर में
यम सन जाड़ा पसरि गेल हे
ले चलइ के घात में
परकिरती के कोप छहाछह
घर के घर उजाड़ रहल हे
अलुआ सरसो अउ मसुरी पर
कोहरा पाला मार रहल हे
निमरा के गर्दन पर धइले
अंगद सन ई लात हे।
