क़ाइदा / हरि दिलगीर
ही क़ाइदा, ही क़ाइदा,
उथण विहण जा क़ाइदा,
खिलण रुअण जा क़ाइदा,
ॾियण वठण जा क़ाइदा,
खियण पियण जा क़ाइदा,
वॻनि लटनि जा क़ाइदा,
नन्ढनि वॾनि जा क़ाइदा,
बज़ार जा, वपार जा,
धिक्कार जा ऐं प्यार जा,
ग़रीब शाहूकर जा।
ही भरम, धर्म कर्म जा,
ही साठ ठाठ पाठ जा,
ॼमण मरण जा क़ाइदा,
खु़शी ग़मीअ जा क़ाइदा,
ही जिं़दगीअ जा क़ाइदा,
ही क़ाइदा ई क़ाइदा
ही क़ाइदनि जो कै़दु आ,
हयाति भी त कै़दु आ।
ही पहरेदार जा ब जा,
ही पहरेदार पाण भी,
क़फ़स में कै़द था रहनि,
जितां उहे कॾहिं भॼी नथा सघनि,
अज़ाब उम्र-कै़द जा सहनि प्या।
वॾियूं वॾियूं भितियूं खड़ियूं,
रवाज जूं, समाज जूं,
मकान जूं, ज़मान जूं,
भितियूं ही धर्म दीन जूं,
भितियूं ही शिक्ल नाअं जूं,
भितियूं ही तूं ऐं आउं जूं,
उन्हनि में प्या असां फिरूं,
सदाईं लइ सदाईं लइ।
उन्हनि भितियुनि खे जेकॾहिं भञण लाइ केरु थो अचे,
- त प्रार्थना सभा में खेसि क़त्ल थो कयो वञे,
- या खेसि जामु ज़हर जो थो जेल में ॾिनो वञे,
- या खेसि थो सलीब ते टंगियो वञे।
(इशारा महात्मा गांधीअ, सुक़रात ऐं यसू मसीह ॾांहुं, नम्बरवार।)
