भारत की संस्कृति के लिए... भाषा की उन्नति के लिए... साहित्य के प्रसार के लिए
चलऽ ने बधरिया / जयराम दरवेशपुरी
Kavita Kosh से
छोड़ि के सेजरिया
चलऽ ने बधरिया
बासी-कुसी कुच्छो लिहा बान्ह
हे धानी होई गेलो सगरो बिहान
बइठ के छपरिया पर
डकऽ हको कउआ
गोदिया में लइ लिहा
कानइत उठल बउआ
चह-चह चहकइ बगान
लोहरा तर चमचम
हँसुआ पिजइलअइ
कटनी के असरा में
खूब इतरइलिअइ
चलऽ काटे लगवे पतान
सूखत पतनियाँ तऽ
अंटिअउनी होतइ
बोझे-बोझे खरहानी
धनमां ढोबइतइ
धमकउआ चूड़ा के कुटान
धन्य-धन्य मगह
अउ धन्य अगहनमां
मटिये में छितरल
कुबेर खजनमां
मेहनत के उड़ऽ हइ निशान।
