छा अखियुनि साणु बाति थी वेई / हरि दिलगीर
छा अखियुनि साणु बाति थी वेई,
नूर सां पुरि हयाति थी वेई।
मुरिक जा गुल जॾहिं मूं खे आछियइ,
रंग वारी हयाति थी वेई।
वारा कारा जॾहिं खिन्डेरियइ थे,
राति जी सूंहं माति थी वेई।
सींधि तुंहिंजीअ में लीक आहे संई,
दूर हर मुश्किलाति थी वेई।
तुंहिंजो पाछो जॾहिं पियो हुन ते,
त हसीं काइनाति थी वेई।
कुझु ज़बां साणु, कुझु अखियुनि सां चयुइ,
बाति में ख़ूब बाति थी वेई।
तुहिंजे साये में जा घड़ी गुज़िरी,
ज़िन्दगीअ जी सबाति थी वेई।
कुर्ब जे कै़द में थियुसि दाखि़ल,
ज़िन्दगीअ जी निजाति थी वेई।
तुंहिंजी आहट ॿुधमि सुबूह समे,
बीठे बीठे ई राति थी वेई।
तुंहिंजी सींगार साणु दिलि आहे,
त ॾिखियल पंहिंजी ॾाति थी वेई।
चीज़, जंहिं ते नज़र पई मुंहिंजी,
उहा तुंहिंजी सिफ़ाति थी वेई।
हिकु दफो तो खिली हो स्वीकारियो,
बस, इहा ई वाई वाति थी वेई।
तुंहिंजे आॾो बि छा घुरां ‘दिलगीर’?
मूं खे कुल हासिलाति थी वेई।
