जय भीम और जय भारत का ला दिया नारा / अमर सिंह छाछिया
जय भीम और जय भारत का ला दिया नारा।
भारत देश हमारा यो बदलग्या सारा।...टेक
आवै इलेक्शन बेठै पान्दी ये मीठे बोहत बतलावैं।
दे दे लोभ आगै का गैरा हरा दिखावै।
काम जरूरी जाणा पड़दा आगै लाड़ गुरावै।
कोठी आगै खड़े सन्तरी वे भी धमकावै।
चार बजे यो आया बारणै स्याहमी नहीं लखारा...
घर का राज बणा राखा यो होर्या दादा लाई।
इबकै दस्त लागर्हे इन कै या पार्टी कांशीराम की आई।
बोला लाड़ जूं हांडै पागल लिस्ट हाथ म्हं ठाई।
इन कै सुन्न का सुआ लागैगा ना लागै और दवाई।
जीत उसे की होगी सबका ऐके हो ईशारा...
यो नरेश सारन लाग रा सही ठिकाणै ला देगा।
जो टक्कर म्हं आवै उसनै घरां बिठा देगा।
वो हट कै इलेक्शन लड़ै कोन्या इसा हाल बणा देगा।
मुख्यमंत्री आग्या तो पानी सतलुज का ला देगा।
हरियाणा आगै ला देगा होगा काम यो थारा...
धन हो कांशीराम राज तेरा भी होगा।
जो टक्कर म्हं आवै उसका सफाया भी होगा।
तीन तिहाई बहुमत इबकै थारा ए होगा।
फेर दहशत किसकी मानो सो जद अमर सिंह साथ म्हं होगा।
मिली आंख तै आंख सबका इसे म्हं इशारा...
