टेडू़ / पल पल जो परलाउ / हरि दिलगीर
1.
अचु त करियूं का बात,
हूंअ न खुटी सघंदी अदा,
हेॾी सारी रात।
2.
हिंएं मंझि हुॻाउ,
तो तन खे ताज़ो कयो,
वरी गले लॻाइ भाउ।
3.
झूंझिकड़ो ऐं झांइ,
बूटियल ॿेई अखियूं, त भी,
आॾो पयो पसांइ।
4.
लंबी कारी राह,
साजन तुंहिंजीअ सार सां,
रोशन सारी राह।
5.
सिज ऐं झुड़ जी झाॻ,
रिली मिली था रंग कनि,
दीपक, मल्हार राॻ।
6.
सिज ऐं झुड़ जी झाॻ,
सारंग में सुलगे पई,
हल्की हल्की आग।
7.
रिम झिम मेघ मल्हार,
ॼणि बन में कंहिं सुंदरीअ,
छेड़ी आहि सितार।
8.
ही तिड़को, हीअ बूंद,
उभ में मुशिकी इंडलठि,
तूं बि हुजीं हा हूंद।
9.
नेणनि में न निगाह,
आउं अकेलो प्यो हलां,
अणखुट अद्भुत राह।
10.
चिति चोॾसि चांडाणि,
चाहु चम्बेलीअ ज्यां टिड़ियो,
स्वासनि में सुरहाणि।
11.
साफ़ चांदनी रात,
हल्की हीर, तलाअ में,
रूपेली बारात।
12.
चौधारी चांडाणि,
अखिड़ियूं थी अख़्तियार में,
मिठिड़, माणि न माणि।
13.
हीअ माण्हुनि जी भीड़,
वाक़िफ़् हिकु भी कोन आ,
मन ते हल्की पीड़।
14.
सिट सिट ते साराह,
शाइर, शइर, मुशाइरो,
ख़ूब, खू़ब, वह वाह।
15.
छा थियो इज़्ज़त नाहि,
इज़्ज़त आगे खां मिली,
सीट त पंहिंजी आहि।
16.
चाढ़ियमि चिणिंग उचाट,
ॿेले में ॿहॻुण किरी,
थी वेई लाट ई लाट।
17.
चंड, सितारा, फूल,
पेटु जॾहिं थो पाह थिए,
कंदो न केरु क़बूल!
