धन हो मायावती तैं पहले नम्बर आई।
फुल बहुमत आया तेरा तनै सारौं की करी सफाई।...टेक
विरोधी कै लाग्या धक्का यो खाट लेवैगा।
हट कै इलेक्शन लड़ै कोनी इसा हाल होवैगा।
जैसे अंग्रेज गये भारत तै यो भी न्यूए जावैगा।
इसकै मर्ज इसी ऐ बेठैगी यो गोली खावैगा।
मायावती कह देजा रेस जै चावै तेरी भलाई...
इननै करा ऐलान होया किलाण सारे इनके बिछड़गे।
जितणे चमचे थे इसके वो मायावती के बणगे।
बण के नाग मारा डंग वो भाजकै बिल म्हं बड़गे।
किस-किस का हाल बताऊं वो सारे फिरगे।
मायावती काढै घोटाला होगी इनकी मंजाई...
कांग्रेस कै लग्या बिराग जणूं भूतणी बड़गी।
बी.एस.पी. की तो इबकै सारै ऐ लहर बणगी।
ये खड़े देखते रहगे सारे मायावती पूरे करगी।
एकड़-दोकड़ का जिकर नहीं किलकी देश म्हं पड़गी।
मायावती कह वो मर लिऐ जिस नै तैं बणाई...
यो समाज लड़ा आज नारा भीम का लाया।
जो टक्कर म्हं आया इनकै वो टोहया भी ना पाया।
विधान सभा का यो इलेक्शन यू.पी. का बताया।
अमरसिंह यो बड़सी का बैठा थी पै आया।
मायावती गई जीत उरै भी इनकी जमानत जब्त कराई...