नाचु पुतिलियुनि जो हर को ई ॾिसंदो रहियो / हरि दिलगीर
नाचु पुतिलियुनि जो हर को ई ॾिसंदो रहियो,
ॾोरि जंहिं जे हथनि में, सो लिकंदो रहियो।
याद ईंदों रहियो, को विसिरंदो रहियो,
वक्तु पंहिंजो इएं ई गुज़रंदो रहियो।
कोई हमदर्दु धाॻे सां सिबंदो रहियो,
दिल जो टाको उखिड़ंदो उखिड़ंदो रहियो।
मींहुं उपदेश जो ख़ूब वसंदो रहियो,
दिल में ॿारणु त साॻियो ई ॿरंदो रहियो।
को अखियुनि सां पुस्तक खे पढ़ंदो रहियो,
मनु त यादुनि जे घाटनि ते घुमंदो रहियो।
क़द्दु लंबो हो पाछे जो, सुसंदो रहियो,
हेठि खां मथे जिअं सिज्जु चढ़ंदो रहियो।
फ़स्लु सुकंदो रहियो, खेतु जलंदो रहियो,
ख़ुश्कु बादलु मथां सिर्फ़ ॾिसंदो रहियो।
भौंरु चुमंदो रहियो, पुष्पु टिड़ंदो रहियो,
मस्तु थी प्रेम-पींघे में लुडन्दो रहियो।
ज़िन्दगीअ जो सफ़रु आ सभिनि वास्ते,
कोई रुअंदो रहियो, कोई खिलंदो रहियो।
मौतु तूफ़ानु आ, ज़िन्दगी आ ॾीओ,
तेज़ तूफ़ान में दीपु जलंदो रहियो।
लोक ॾिसंदा रहिया, ख़ूब रुअंदा रहिया,
हू त पोईअं घड़ीअ ताईं खिलंदो रहियो।
तोड़े फेरे नज़र ॿिए तरफ़ तो कई,
दिल में नश्तरु तॾहिं भी त चुभंदो रहियो।
हर घड़ीअ मस्त ईंदा ऐं वेंदा रहिया,
जामु महफ़िल में साॻियो ई फिरंदो रहियो।
हरको पीते बिना खू़ब झूमण लॻो,
शइर-ए-दिलबर जो रंगु चढ़ंदो रहियो।
