न फुलु पटियूं था, न गुलु छिनूं था / हरि दिलगीर
न फुलु पटियूं था, न गुलु छिनूं था,
चमन में हूंदे चमन में नाहियूं,
हयात जे अंजमन घुमूं था,
हयात जे अंजमन में नाहियूं।
कंवल जो गुलु आ तलाब अंदर,
तलाब में हू तॾहिं बि नाहे,
असां दुखनि में दुखी न आहियूं,
सुखनि में रहंदे सुखी नाहियूं।
जिते वञूं, उति ॾियूं मुहब्बत,
जिते वञूं, उति वठूं मुहब्बत,
जहान में सा जॻहि न आहे,
जिते असां दोस्तनि में नाहियूं।
वशर-वशर सां अथाह उल्फ़त,
उन्हीअ खे समुझूं असां इबादत,
खु़दा जी उल्फ़त जो ढोंगु जेके रचिनि था,
तिनि आबिदनि में नाहियूं।
गगन में उॾिरी, गगन जा नक़्शा कढी,
ज़मीं खे गगनु कंदासीं।
असां जो धरतीअ सां प्यारु आहे,
गगन जे लइ को गगन में नाहियूं।
असां जो फ़नु आहि कोन फ़न लइ,
असां जो फ़नु ज़िन्दगीअ लइ आहे,
फ़क़ति लिखण वास्ते लिखनि जे,
शुमारु तिनि शाइरनि में नाहियूं।
जॾहिं बि साणेह जा सनेहा,
असां खे परदेस में पुॼनि था,
तॾहिं वतन में था पाणु समुझूं,
वञे थो विसिरी वतन में नाहियूं।
