भारत की संस्कृति के लिए... भाषा की उन्नति के लिए... साहित्य के प्रसार के लिए
विनयावली / तुलसीदास / पद 131 से 140 तक / पृष्ठ 8
Kavita Kosh से
(पद 131 से 140 तक/ तुलसीदास / पृष्ठ 8 से पुनर्निर्देशित)
पद (136-7) से (136-8) तक
(136-7)
जोवन जुबती सँग रँग रात्यो।
तब तू महा मोह-मद मात्यो।।
ताते तजी धरम-मरजादा।
बिसरे तब सब प्रथम बिषादा।।
बिसरे बिषाद, निकाय-संकट समुझि नहिं फाटत हियो।
फिरि गर्भगत-आवर्त संस्तिचक्र जेहि होइ सोइ कियो।
कृमि -भस्म-बिट-परिनाम तनु, तेहि लागि जग बैरी भयो।
परदार, परधन, द्रोहपर, संसार बाढ़ै नित नयो।
(136-8)
देखत ही आयी बिरूधाई।
जो तैं सपनेहुँ नाहिं बुलाई।।
ताके गुन कछु कहे न जाहीं।
सो अब प्रगट देखु तनु माहीं।।
सिर-कंप , इन्द्रिय -सक्ति प्रतिहत, बचन काहु न भावई।
गृहपालहूतें अति निरादार, खान-पान न पावई।
ऐसिहु दसा न बिराग तहँ,तृष्णा -तरंग बढ़ावई।।
