पाछा / हरि दिलगीर
रात जो समो ऐं सड़क डिघी,
डिघा डिघा वण छायादार,
बिजली बल्ब मथां पिया टिमकनि,
आउं अकेलो घुमां प्यो,
सड़क सुञीअ ते धीरे धीरे।
मन-मस्तीअ में आउं ॾिसां थो,
मूं मां हिकिड़ो पाछो उभिरी,
उभिरी, उभिरी, लंबो थी,
बेहद लंबो बणिजी,
आखि़र गाइब थिए थो मूं में ई।
वरी बि पाछो पैदा थिए थो,
डोड़ी पकिरणु खेसि घुरां थो,
लेकिन पकिरणु आहि महाल।
पाछा, पाछा, चौधर पाछा,
पाछा नाच नचनि था।
हीअ पाछनि जी दुनिया आहे,
मूं मां उभिरिया मूं में गुम थिया,
आखि़र पाछा आहिनि छा?
पाछा आखि़र पाछा आहिनि,
छा ही पाछा कुझु भी नाहिनि?
या तिनि खे का हस्ती आहे?
जे पाछे खे हस्ती आहे,
पकिड़े छो न सघां थो खेसि,
जे हिन खे का हस्ती नाहे,
पोइ ॾिसां थो किअं मां खेसि?
छा मां भी को पाछो आहियां
कंहिं गै़बी हस्तीअ जो?
जंहिं मां पैदा थियो मां आहियां,
ऐं जंहिं में मां गुम थी वेंदुसि।
पाछा नाच नचनि था।
