बेरहम पिता परमेस्सर / रामदेव भावुक

सुखलॅ हक के सरवर
श्रम कुम्हलाय गेलॅ हो भाय
कि अहो भाय
बेबस्था भेलॅ बइमान
मंहगी हरजाय भेलॅ हो भाय

घटलॅ टका के मोल
बजार बौराय गेलॅ हो भाय
कि अहो भाय
चावल भेलॅ मरीच
गहूम मिरचाय भेलॅ हो भाय

पूजा सें न पिघलतॅ पत्थर
मन पथराय गेलॅ हो भाय
कि अहो भाय
बेरहम पिता परमेस्सर
माय सतमाय भेलॅ हो भाय

थैलीशाही जहर के सुइया
शरीर समाय गेलॅ हो भाय
कि अहो भाय
जनतंत्र के धेनू गाय
आय बिसुखाय गेलॅ हो भाय