भारत की संस्कृति के लिए... भाषा की उन्नति के लिए... साहित्य के प्रसार के लिए
मस्त / हरि दिलगीर
Kavita Kosh से
ओ मस्ताना, मस्ती इहा किथां आंदी थी?
जंहिं मस्तीअ जा मटिका भरे भरे पीता थी,
उन मस्तीअ मां मूंखे भी का सुर्क चखाइ।
आउं त आहियां लेखारी,
लेखो आहि लहूअ में मुंहिंजे,
”ॿ ऐं ॿ चार“ कंदो मां आहियां,
ॾींदो आहियां, मगर वठण लाइ,
वठंदो आहियां त भी वठण लाइ,
मां छा ॼाणां मस्ती छाहे?
ओ मस्ताना, मस्ती इहा किथां आंदी थी?
मुंहिंजे सिर ते आहि मुसीबत ‘मां’ ‘मां’ जी,
वक्तु विछूंअ ज्यां मूंखे ॾाढा डंग हणे थो,
अक्ल जी उॾही मंू खे खाई वेई आ,
”ॼाण“ जिभियूं ॾेखारे मूं खे साड़े थी;
तिनि सभिनी खां,
तो किअं पंहिंजो पांदु बचायो?
ओ मस्ताना, मस्ती इहा किथां आंदी थी?
मूंखे भी सेखारि त तो ज्यां उॾिरां आउं,
कै़द ज़मां ऐं कै़द मकां मां निकिरां आउं,
आगि अकुल खे लाई,
वेसु वजूदी साड़े,
तो ज्यां नंगो नचां,
पंहिंजो पाणु पसां,
ओ मस्ताना, मस्ती इहा किथां आंदी थी?
