राजनीति के गोपनीय अध्याय / विजेता मुद्गलपुरी
राजनीति के गोपनीय अध्याय पढ़ो तों गुण्डागर्दी
काम करो ऐसन कि जेकरा से काँपे खाखी के वर्दी
इसकूल कालेज कत्तो पढ़वे, ऐसन पाठ कहीं नै मिलतो
जीवन में ढेरी रस्ता छै, ऐसन बाट कहीं नै मिलतो
ई गंगा में गोंता लगबो, एकरा से तुरते फल मिलतो
राजनीति के ई गंगा सनदोसर घाट कहीं नै मिलतो
पद पर नै कोय दोष लगै छै, जेना कि नै मेढक के सर्दी
राजनीति के गोपनीय अध्याय पढ़ो तों गुण्डागर्दी
लोग कहै छै, इसकूल-कालेज वाला सब बेकार के डिगरी
कलम धरै वाला पर अखनी हावी छै तलवार के डिगरी
बी.ए., एम.एम. वाला से ऊ अँगुठा छाप बड़ा छै जेकरा
ए.के. सैतालीस, मासकेट, सेमी, एस.एल.आर. के डिगरी
सगरो एक्कर मान बढ़ै छै जब बाढ़ै दहसतगर्दी
राजनीति के गोपनीय अध्याय पढ़ो तों गुण्डागर्दी
सोना बरसै छै जैजाँ लोहा के जय जयकार मनै छै
बहुमत से लोहा लै ले अब लोहा से सरकार बनै छै
शक्ति-भक्ति के जुग नै, ई जुग के तों लोहा जुग मानो
बनल बेचारा बिन लोहा के, लोहे से रंगदार बनै छै
खादी लोहा के संगम पर कानून भी मानै छै हर्दी
राजनीति के गोपनीय अध्याय पढ़ो तों गुण्डागर्दी
