ले चल मायावती हाम नै भी तेरी गेल / अमर सिंह छाछिया
ले चल मायावती हाम नै भी तेरी गेल।
बैठ हाथी पै करां दिल्ली की सेल...टेक
तनै देख के मायावती हम कट्ठी होगी सारी।
माला घाल करां स्वागत तूं लागै इतणी प्यारी।
आंख खोल कै देख चौगरदे या कितणी जनता आरी।
लाखों तै हो जीत तेरी या दुनिया ए कहरी।
फिरगी लहर बदल गया शहर तै फूलां पै खेल...।
आजयो दिन बड़ा खुशी का आया।
पिचासी परसेंट यो समाज जुड़ कै नै आया।
जय भीम और जय भारत का नारा भी लाया।
बी.एस.पी. का नेता कांशीराम ए बणाया।
इन गरीबां पै होए कांड मारो इनकै सेल...
इलेक्शन म्हं जिकर तो सबका ए चालै सै।
जो टक्कर म्हं आवै वो तो दुश्मन ए लागै सै।
भा.ज.पा. नै तो इबकै सारे नाटै सै।
जड़ै हो प्रचार इनका ओडै डलै लागैं सै।
या खड़ी लीक पै मारै किलकी ना टंकी म्हं तेल...
इबकै तो देश सारे म्हं शोर होरा सै।
बी.एस.पी. का तो सारे ए जोर होरा सै।
विरोधी तो जमाये बेहोश होरा सै।
मरकै पांडा छूटैगा हाल इसा ऐ हीरा सै।
अमरसिंह छाछिया या बचै नहीं हाड हो लिया फेल...
