"तुम बिनु जीवन भार भयो / स्वामी सनातनदेव" के अवतरणों में अंतर

राग तैलंग, तीन ताल 30.9.1974

तुम बिनु जीवन भार भयो।
कब लगि भटकाओगे प्रीतम! अब सब सार गयो॥
भटकन ही में गयी आयु सब, उर न नेह उनयो।
करि-करि थक्यौ न अब करिबे को कोउ उछाह रह्यौ॥1॥
जो चाह्यौ पायौ न स्याम! सो, अनचाह्यौ उदयो।
अपनी एक न चली प्रानधन! अब सब मान ढयो॥2॥
कहा करों नहिं सह्यो जात अब, अबलौं बहुत सह्यौ।
अपनो सब पुरुषारथ थाक्यौ, तुव पद-सरन गह्यौ॥3॥
‘सरनागत की पत राखत हो’ सब कोउ यही कह्यौ।
अब कोउ और न रह्यौ आसरो, जो कछु रह्यौ जह्यौ॥4॥
निश्चय ही करिहो करुना अब, उर विश्वास भयो।
तव करुना बिनु या जग में कब काको मोह गयो॥5॥