"धत् तेरी के! / सतीश मिश्रा" के अवतरणों में अंतर

धत् तेरी के! लोर? पोंछ रे मरदे!
रोवऽ हें भरल जवानी में?
तोर उमर तो ओइसन हे, जे आग लगा दे पानी में।

सुरता कर, बइसाख-जेठ में कइसन चिनगी दहक रहल हल
चन्नन के गाछी से निकलल पुरबा-पछया लहक रहल हल
साँप पोदीना में लपटाएल हाँफ रहल हल, अगिआएल हल
पीअर अबटन लगलो पर भी गोर कनेवाँ करिआएल हल
पर असाढ़ के पहिले दिन जब उमड़-घुमड़ के घहरल बदरी
सौ-सौ घड़ा बरस गेल तलफल सूरुज के मरदानी में।
तोर उमर तो ओइसन हे, जे आग लगा दे पानी में।

घूम रहल हे जब पहिआ तो उपरे वाला नीचे अैते
कोई न रोकत, घुमते-घुमते नीचे वाला उपरे जैते
रात देख के मत घबरो तूँ, रात तोरा भिर ठहर न पैते
बुतरू हे हनुमान, भला ऊ लाल इंगोरा कहाँ पचैते?
जइसे गुजरल सावन-भादो, पूस-माघ भी गुजरत ओइसे
पतझर हारत, फुजकत पत्ता मुरझल रुख के कानी में।
तोर उमर तो ओइसन हे, जे आग लगा दे पानी में।

हार के डर से काम न करना-मुरदा के पहचान
देख के बाधा विचलित होना-मुरदा के पहचान
अपन राह पर चलते जाना-जिन्दा के पहचान
चलते-चलते जान गँवाना-जिन्दा के पहचान
मिले, अगर जो मिले सफलता, दूर रहे तों कोई बात न
कभी पताका झुके न पावे उद्यम के रजधानी।
तोर उमर तो ओइसन हे, जे आग लगा दे पानी में।