भारत की संस्कृति के लिए... भाषा की उन्नति के लिए... साहित्य के प्रसार के लिए
मोॅन छै मरुवैलोॅ / अमरेन्द्र
Kavita Kosh से
Lalit Kumar (चर्चा | योगदान) द्वारा परिवर्तित 03:03, 8 जून 2016 का अवतरण ('{{KKGlobal}} {{KKRachna |रचनाकार=अमरेन्द्र |अनुवादक= |संग्रह=कुइया...' के साथ नया पृष्ठ बनाया)
मोॅन छै मरुवैलोॅ
बोरसी मेँ आगिन छै जेना पझैलोॅ।
फुँकला सेँ फुर-फुर बस राखे उड़ै छै
उड़ी-उड़ी आँखी मेँ सबटा गड़ै छै
जिनगी रोॅ बोरसी मेँ सुख के जे चेला दौं
दुक्खे टा आँखी मेँ आवै छै उधियैलोॅ।
रखलेॅ जे छेलाँ सब रिस्ता-चपोती केॅ
कोरा आ धोआ, अछिन्नोॅ बिहोती केॅ
मसकी केॅ भाँगलै सब-अपनौती रिस्ता
जे कुच्छु बचलोॅ छै, सब्भे टा ओझरैलोॅ।
सब कुछ ओराय गेलै, बचलोॅ छै भाँगटे टा
सँघरी केॅ ऐलोॅ छै विपद भरी-नाँगटे टा,
मुट्ठी भर सुक्खोॅ लेॅ बेकल छी सद्दोखिन
बोरसी मेँ करसी लेॅ जिनगी छै कठुवैलोॅ।
-आज, पटना, 10 दिसम्बर, 1996
