के कारण था के कर बैठ्या / सतबीर पाई
के करणा था के कर बैठ्या बुरा होया न्यू हाल तेरा
क्यूं होर्या परेशान ध्यान कर कित जा रह्या सै ख्याल तेरा...
शिक्षित संगठित संघर्ष करो न्यू भीम राव नै बोल दिया
लेकै हाथ तराजू इस पूरे भारत को तोल दिया
दलित पिचासी पन्द्रा सवर्ण सब न्यारा न्यारा खोल दिया
सबका हो अधिकार एक सा बजा चोगिरदै ढोल दिया
एक वोट उसनै अनमोल दिया जो लोग वे जाते डाल तेरा...
उसनै भारत का संविधान बणाया सोच समझ कै सारी
मांग लिए अधिकार आपणे कहकै भागीदारी
बल-बुद्धि के साथ राखियो अपणा संघर्ष जारी
शूद्र करियो राज आज एक दे दी ताकत न्यारी
इसमैं झूठ नहीं सै म्हारी हक लिख्या दिखा द्यू चाल तेरा...
भाग्य किस्मत स्वर्ग नरक तनै कती त्यागणा चाहिए
जात-पात के भेदभाव से दूर भागणा चाहिए
भीमराव के समझ मिशन को गैल लागणा चाहिए
कई हजार साल होगे सोते पर आज जागणा चाहिए
तू बहुत सताया कोन्या छपाया के इब तक जी काल तेरा...
एक दिन कर दूं राज काज इन भारत के नर नारां पै
हम इस देश के शासक हैं इतना लिख दो दीवारां पै
मैं जाणू मेरा काम जाणता लडूं थारे अधिकारां पै
पाई वाले सतबीर लागज्या बहुजन के प्रचारां पै
होकर कै नै एक देख फेर पूरा हौवै सवाल तेरा...
