सबके एक्के कहानी रहलोॅ छै / अमरेन्द्र

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

अमरेन्द्र » रेत रोॅ राग »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

सबके एक्के कहानी रहलोॅ छै
जकरोॅ धरती पेॅ पानी रहलोॅ छै
केना रधिया रोॅ रौल वैं करती
जे कि बच्चै सें रानी रहलोॅ छै
ओकरा दुनियाँ में कोय डरैतै की
जे कि काठी-कमानी रहलोॅ छै
इक समन्दर छै-कोय मछली केॅ
आरो कोय ह्वेल छानी रहलोॅ छै
रात में हेना हवा के ई सरसर
लागै शैव्या ही कानी रहलोॅ छै
प्यार हमरौ रहै - सबूतोॅ में
लोरे एकठो निशानी रहलोॅ छै
लोग चुप छै मतुर ई जानै छै
केकरोॅ की-की कहानी रहलोॅ छै
जे कि रावण बनी विरोधी छै
ओकरे दिश भी भवानी रहलोॅ छै
हमरोॅ चर्चा छै ठोरोॅ-ठोरोॅ पर
के नै हमराकेॅ जानी रहलोॅ छै

-1.6.91