गाँवों में गाँव एक सेमापुर गाँव / आभा पूर्वे

गाँवों में गाँव एक सेमापुर गाँव
मोॅन रै रहि-रहि वही ठियां जाँव

केला के गाछ जहाँ ठामे ठाम खाड़ोॅ
ओकरे नीचु में हौ प्रेम जहाँ गाढ़ोॅ
दै छै बटोही केॅ ठामे ठाम छाँव

छोटका लड़कवा जहाँ देवरे सब लागै
आरोॅ जनानी सब सासुवे रं भावै
स्वामी के सनेश कहै कौआ गागी ‘काँव’

जहाँ कि कोशी के उमतैलोॅ धार
खींचै छै मोहै छै सौसे संसार
मोॅन रहै सेमापुर शहरोॅ में पाँव