गुलनि जी टोकिरी / हरि दिलगीर

ज़िन्दगी ॼणि त गुलनि जी का हसीं टोकिरी आ,
राति ऐं ॾींहं जा गुल-फुल तंहिं में,
टोकिरी आहि गुलनि साणु सथियल,
पर गुलनि जे हेठां,
मौत जो नांगु सुतो पियो आहे।

मूंखे कल नाहि त ही नांगु कॾहिं फणि कढंदो,
ऐं गुलनि मां हू कढी फणि ॿाहिर,
जिस्म मुंहिंजे खे अची डंगींदो।

मूंखे कल आहि, अंदर नांगु आहे,
पर त भी टोकिरी ॾाढी थी वणेमि,
मूं खे रंगीन गुलनि ॾाढो मोहियो आ,
छा त सुरहाणि उन्हनि में आहे!