भारत की संस्कृति के लिए... भाषा की उन्नति के लिए... साहित्य के प्रसार के लिए
धीणाप / श्याम महर्षि
Kavita Kosh से
Sharda suman (चर्चा | योगदान) द्वारा परिवर्तित 19:14, 17 अक्टूबर 2013 का अवतरण
कागलै नै कागलौ
अर कुरजां नै कुरजां ई
रै‘वण दो
चाहै किणी रौ पीव जावै परदेस
तो कोई रो बीरो आवै घरां,
आं बापड़ै भोळा-ढाळां
पंखेरूआं माथै
रीस बळणौ
कै राजी हुवणौ
दोनूं रो ई अरथाव
उणां नै ठा नीं।
मिनक्यां रो गैलो काटणो
अर गधियां रो जीवणो बगणौ
कै कोचरी रे बोकणै रो
न्यारो मतळब बणावणौ
उणा साथै न्याय नीं,
धरती अर धरती री
प्रकृति रो धीणाप
फकत थारौ ई नीं
पंख-पंखेरू
जीव-जिनावर
अर थारौ म्हारो सगळां रो ई है।