सिन्धी कवी / हरि दिलगीर
केतिरा ॾातार ॾियण लाइ मुंतज़र,
पर वठण लाइ को बि कोन्हे,
हिन्दु में सिन्धी कवी, महान कलाकार,
लिखनि ख़ूब, पर पढ़ण लाइ को बि कोन्हे;
पाण लिखंदा आहिनि, पाण पढ़ंदा आहिनि,
पाण खु़श थींदा आहिनि।
उहे इएं आहिनि,
जिएं को जाबुलू झरिणो,
जो कंहिं बि प्यासे जी पहुच खां परे आहे।
जिअं हिकु मेवेदार वणु,
पर मेवे खाइण लाइ को बि कोन्हे।
जीअं हिकु खु़शबूदार गुलु,
जंहिं खे पटण, सिंघण ऐं चुमण वारो कोबि कोन्हे।
जिअं हिक हसीना,
जंहिं खे प्यारु करण लाइ को बि कोन्हे।
जिअं हिक सुन्दर सेज,
जंहिं ते लेटण लाइ को बि कोन्हे।
जिअं हिकु मधुर साजु़,
उते, जिते वॼाईंदड़ जा हथ लूला हुजनि।
जिअं हिकु उस्ताद गायकु,
जंहिं खे ॿुधण लाइ सभु ॿोडा आहिनि।
जिअं हिकु अनोखो चित्रु,
उन्हीअ चित्रशाला में, फक़त अंधा ई ईंदां आहिनि।
जिअं हिकु लासानी ऐक्टरु,
उन्हीअ नाटक घर में, जिते को बि मौजूद कोन्हे।
जिअं हिकु सिजु,
उन्हीअ ग्रह ते, जितां जा रहवासी चिॿरा ऐं चमड़ा आहिनि।
सिन्धी कवी लिखंदा आहिनि त पाण लाइ,
संदनि पाठकु, पाण खां सिवाइ, केरु बि कोन्हे।
(भला हीअ रचना मूं कंहिं लाइ रची आहे?)
